何潤東出席聖誕卡簽名會

台灣型男何潤東出席「MegaBox 夢幻旋轉聖誕城 X何潤東聖誕卡簽名會」，即席獻唱一曲冧粉絲，大會更安排兩位小妹妹向他獻吻，MegaBox總監文靜芝也特地送他一隻小狗公仔，寓意對方盡快覓得可愛、溫順的女友。

何潤東透露正忙於搬新屋，在台灣與他同住的父母更向他催婚：「媽咪、爹哋預先幫我設計咗間Baby房，可能無形中想畀少少壓力我，間房重要喺我房隔離。（BB房有畀意見？）冇，我意見係唔好整住，我都未有BB，但佢哋話整住先，整完就有。」他表示結婚生仔急不來，又強調目前未有女友。他正在橫店拍內地劇《芙蓉錦》，希望向劇組爭取一日假開P慶祝聖誕。