林新強唔答英文Question被柴台 余若薇幫ATV一把

做得律師，英文當然了得，唔少律師更加係鍾意講英文多過講中文，但香港律師會會長林新強或者唔係，佢星期一開記者會，介紹律師會嘅政改立場，但當英文台記者發問時，林新強拒絕以英文回應。林新強嘅傲慢，俾亞視國際台報道，呢條新聞喺YouTube獲近萬點擊率。
呢件事仲有續集，立法會法律界議員郭榮鏗話，收到好多業界投訴林新強，話對林新強好失望，批評佢破壞律師會形象。郭榮鏗話，唔少喺香港嘅律師只懂英文，平日都要依賴英文台、英文報紙先可以知天下事，基於事件嘅嚴重性同咁多人投訴，佢稍後同林新強定期會面時，會向對方轉達不滿。被問到林新強係咪英文差，所以唔敢用英文答，郭榮鏗話唔關事：「做得律師會會長，英文點會不濟？」

資深大律師余若薇喺fb話，首次為亞視拍掌，仲話林新強只係代表事務律師，唔係大律師。余若薇仲話，當日律師會公佈佢嘅意見書，成份都係英文，點可能唔用英文回應英文問題呢？

國際台總編「搞大件事」

講番ATV，聽聞決定「搞大」呢件事嘅，包括亞視新聞國際台總編輯Yonden Lhatoo，聽聞Yonden為人相當有性格，聽到前線受到咁樣嘅對待，決定報道。根據維基百科嘅資料，Yonden喺印度讀新聞，曾經喺《英文虎報》工作，97年加入亞視至今，係國際台年資最深嘅主播。