首度同場田蕊妮寸「舊愛」冇進步

視后田蕊妮（阿田）上午出席大型慈善活動，對於她得獎致詞時稱「由冇人睇o既電視台開始做」，亞視高級副總裁葉家寶昨日怒斥「飲水不思源」兼「不負責任」，自事發後二人今早首度同場，期間記者要求兩人合照，惜葉家寶尷尬扮聾不為所動，本來已踏出一步的阿田則被無綫職員及時阻擋，阿田惟有擰頭「say no」。事後，兩人在酒樓再次碰面，問到有否感尷尬？阿田說：「冇冇冇，冇尷尬，我唔介意（合照）。（公司唔畀影？）我唔知點形容頭先個感覺，但感覺唔係尷尬，有少少似同前男友拍拖好耐，然後分咗手喺街見到唔知講咩好，唯有我有我生活，佢有佢o既忙碌啦。」她又笑指雙方和平「分手」，但對方點諗就唔知，又謂自己天秤座，生日願望是世界和平。問到公司有否給予指示？阿田說：「冇特別指示。」

對於被葉家寶指不飲水思源，阿田即打趣道：「咁我返亞視做好冇？R撈囉咩事?!我有好強o既感覺，好似分咗手o既戀人，大家距離好似愈來愈遠，男友冇喺人生一路進步，但見到個分手女友一路進步，好驚人哋唔知我哋拍過拖，周圍同人講係佢前女友。（擔心又畀人話你講亞視冇進步？）我係一個比較真o既人，我唔識講假話。」她又指近日工作繁忙，未與老公杜汶澤討論此事。

提到亞視指面對新競爭對手也「未驚過」，問覺唔覺得亞視有競爭能力？阿田聞言沉默十秒「冇聲出」，記者指亞視年中開劇，她即笑謂：「我依家打算R撈，我諗住好似龍小菌咁笠面具去做。」之後她續說有競爭才有進步，希望亞視充滿能量地有競爭能力，對整個行業也有好處。

主動搵阿田合照葉家寶再籲：唔好忘本

亞視高級副總裁葉家寶和視后田蕊妮（阿田）參加完活動後，於酒樓碰面，席間葉家寶大方主動走向阿田，與對方握手兼搭膊合照。事後，葉家寶表示：「我啱啱同佢講加油努力，佢話『得架啦』，開頭重話『你話我唔飲水思源』，我話『你始終都係亞視出身o架嘛』，我覺得每個人最緊要唔好忘本，因為呢度始終係你成長o既一個經歷、過程，唔可以突然抹黑咗段歷史。」對於阿田戲言返亞視R撈，葉家寶稱所有藝人，不論已離巢、有或無合約都歡迎，並謂：「亞視o既門常開，只要我哋覺得佢係啱個節目、角色都會考慮。」問到是否已消怒氣？他說：「可能有時大家講嘢衝口而出。（覺得無綫唔畀合照冇大將之風？）唔會，係我唔過去啫，唔緊要，我哋唔計較呢樣嘢，大家無論職位高低，喺演藝界都係想盡一分力，為香港做多啲好節目，加強香港創意工業，因為好多人覺得香港節目落後，我覺得應該更加要團結。」

提到阿田暗寸亞視冇進步，葉家寶說：「我認為亞視呢幾年係飛躍咁進步，唔可以話亞視停流咗某個階段，我哋由以往側重娛樂方面，依家提升到希望畀觀眾多啲資訊，對時事、生活o既了解，我哋係跳越咗另一個層面，所以我哋絕對冇停流喺某個階段。我哋都好關心每一個離開咗o既藝人，見到佢有咁o既成績我哋都好高興，只不過我哋希望每個同事，都記得當年都喺亞視培育佢哋出嚟，如果佢冇參加《未來偶像爭霸戰》可能佢o既歷史都要改寫。」他又透露亞視正密鑼緊鼓籌備劇集中，估計約3、4月會公布新消息。