葉家寶叫田蕊妮：做人要飲水思源

亞視高級副總裁葉家寶於深水埗出席亞洲會慈善活動，於訪問時問到亞視有何新動向？葉家寶稱亞視春晚將請來不同歌唱比賽的冠軍，獻唱串燒金曲：「今年會請亞洲星光大道同未來偶像爭霸戰嘅得獎者嚟唱歌，可惜依家請唔到田蕊妮，佢都係亞視出身，做人要飲水思源。（阿田奪視后時暗指冇人睇亞視？）我覺得係個唔負責任嘅講法，亞視由嗰個年代（即田蕊妮在亞視工作期間）到依家都好多人睇。」

另外，談到香港電視即將開台，亞視會否面臨強大競爭？葉家寶對此表示「未驚過」：「競爭日日都有，我哋唔會驚，只會做好自己，我哋嘅競爭對手唔局限於本地。」







田蕊妮補鑊：感激栽培

亞視出身的田蕊妮（阿田）上月在無綫台慶頒獎禮上榮升為雙料視后，不過當日其得獎言論卻辣慶亞視高層，插爆阿田「飲水不思源」及「不負責任」！事後阿田直言根本冇踩任何人，指一直對亞視昔日栽培心存感激。

去年憑着劇集《巨輪》中的「倀雞英」一角成為「雙料視后」的阿田，慶祝活動浪接浪，日前更豪使5位數字請《巨》台前幕後吃飯！有人歡喜有人「嬲」，由於阿田當日得獎時，聲淚俱下的說：「我由冇咩人睇電視台開始做，到依家有咁多人睇，得到觀眾認同。」這番言論即觸動亞視神經，昨日亞視高級副總裁葉家寶在深水埗出席「亞洲會甲午年迎春送暖活動」時，句句有骨寸爆阿田！

寸爆阿田不負責任

葉家寶指亞視會邀請過去曾舉辦過的歌唱比賽，包括《未來偶像爭霸戰》等得獎者參與春節晚會，並寸爆的說：「亞視嚟緊會搞第4次春晚，會請張崇基、張崇德唱歌，可惜依家請唔到田蕊妮啦！其實佢係亞視出身，做人要飲水思源！」明插在1993年參加《未來偶像爭霸戰》獲金獎而進身娛樂圈的阿田。

葉家寶繼而再插，指阿田當日頒獎禮上的言論不負責任，他說：「我覺得係唔負責任嘅講法，亞視由嗰個年代到依家都好多人睇！」更指亞視就算面對新競爭對手都未驚過：「競爭日日都有，我哋會做好自己，而競爭對手都唔會局限於本港，嚟緊亞視會喺年中開劇。」至於同場的亞洲會會長魏秋樺除表示將返亞視拍古裝劇，又指春晚會穿王昭君戲服唱流行曲，大玩Crossover！

要多謝亞視畀機會

昨日本報記者致電阿田，對於葉家寶「雙插」她飲水不思源兼不負責任時，她即時解畫表示冇踩任何人：「我拎獎番言論係冇踩任何電視台，我出身亞視，我冇唔飲水思源！」阿田自言對亞視心存感激，憶述亞視當年給她拍劇機會，才造就她今時今日成就：「我要多謝亞視當年畀機會我拍《縱橫四海》，當時我未做過演員，但因為呢套劇培養咗我對演戲嘅興趣，亦令我有今時今日嘅成就！」至於葉家寶自言亞視多人睇，阿田謂：「一間公司自我感覺良好係一件好事。」而談到亞視找她唱春晚？阿田說：「亞視冇搵過我，合約都唔允許去唱。」